Сурхондарёда Афғонистондан олиб кирилган қарийб 600 кг наркотик мусодара қилинди
Жиноий гуруҳ наркотик моддаларни тонг саҳарда яширин равишда олиб ўтишга уринган.
Сурхондарёда Афғонистондан олиб кирилаётган қарийб 600 килограмм наркотик моддалар тўхтатиб қолинди. Бу ҳақда Давлат хавфсизлик хизмати маълум қилди.
Қайд этилишича, ДХХ тезкор бўлинмалари, Чегара қўшинлари ҳамда Божхона қўмитаси ходимлари ҳамкорлигида ўтказилган тезкор-қидирув тадбирлари давомида йирик миқдордаги наркотик моддаларнинг ноқонуний олиб кирилишига чек қўйилган.
Маълумотларга кўра, жиноий гуруҳ тонг саҳар вақтида чегара назорати сусайишидан фойдаланиб, тақиқланган моддаларни мамлакат ҳудудига олиб киришни режалаштирган.
Хусусан, Афғонистон фуқароси бошқарувидаги “Mercedes” русумли юк автомобили Сурхондарёдаги “Термиз-авто” чегара божхона постида белгиланган тартибда текширувдан ўтказилган.
Текширув жараёнида автомобиль тиркамасида олиб келинаётган “Doosan” русумли экскватор инспекцион кўрик мажмуаси орқали сканер қилинганда, унинг кўтарувчи қисми ичида шубҳали жисмлар мавжудлиги аниқланган. Шундан сўнг махсус техник воситалар ёрдамида ўтказилган қўшимча кўздан кечириш ишлари давомида экскваторнинг “стреласи” ичига яширилган 593 килограмм “гашиш” ва 3 килограмм “опий” моддаси борлиги фош этилган.
Ҳозирда мазкур ҳолат юзасидан Жиноят кодексининг тегишли моддалари билан жиноят иши қўзғатилиб, наркотик воситаларнинг эгалари ва иштирокчиларини аниқлаш ҳамда қўлга олиш бўйича тезкор тадбирлар давом эттирилмоқда.
