Тошкент вилоятида кондиционер ортилган юк машинаси ёниб кетди
Ёнғин кондиционер ортилган тиркама юкхонасида келиб чиққан.
Тошкент вилоятининг Пискент туманида юк машинасида олиб кетилаётган кондиционерлар ёниб кетди. Ҳодиса юзасидан суриштирув ишлари олиб борилмоқда.
Вилоят ИИББ ЙҲХБ маълумотига кўра, воқеа 16 май куни соат тахминан 17:00 ларда А-373а “Тошкент–Ўш” автомобиль йўлининг Пискент тумани ҳудудидан ўтган 10-километрида содир бўлган.
1983 йили туғилган ҳайдовчи бошқарувидаги “Scania” русумли юк автомобили ҳаракатланиб кетаётган вақтда унга уланган тиркама юкхонасида бўлган юк — кондиционерларда ёнғин келиб чиққан.
Оқибатда юк ортилган тиркама тўлиқ ёниб кетган. Юк автомобилининг ўзи эса тиркама ўз вақтида ажратиб олингани сабабли шикастланмаган.
Қайд этилишича, ҳодиса натижасида фуқароларнинг соғлиғига зарар етмаган.
Ҳозирда мазкур ҳолат юзасидан Пискент тумани Фавқулодда вазиятлар бўлими томонидан суриштирув ишлари олиб борилмоқда.
