Украинанинг собиқ бош вазири Зеленскийни коррупция туфайли истеъфога чиқишга чақирди
Вазир Украинадаги вазиятни “дунёда тенги йўқ ҳолат” деб атади.
Украинанинг собиқ бош вазири Николай Азаров мамлакатда юзага келган коррупция можаролари фонида Владимир Зеленскийни истеъфога чиқишга чақирди. Бу ҳақда у TASS агентлигига берган интервьюсида маълум қилган.
Азаровнинг таъкидлашича, “Миндич кассеталари” деб ном олаётган материаллар эълон қилингач, Украинадаги сиёсий вазият янада кескинлашган. У мамлакатдаги ҳозирги ҳолатни “дунёда тенги йўқ вазият” деб баҳолаган.
Собиқ бош вазирнинг фикрича, коррупция билан боғлиқ гумонлар нафақат алоҳида амалдорларга, балки давлат раҳбари ва унинг энг яқин атрофидагиларига ҳам тааллуқли бўлиб қолган.
Азаров, шунингдек, Зеленский офисининг собиқ раҳбари Андрей Ермакнинг ҳибсга олиниши масаласига ҳам тўхталган. Унинг айтишича, Ермак давлат бошқарувида муҳим роль ўйнаган, халқаро ташрифлар ва асосий сиёсий қарорлар билан шуғулланган.
Аввалроқ Украина Олий коррупцияга қарши суди Андрей Ермакни пул ювиш иши бўйича 60 кунлик қамоққа олиш ҳақида қарор чиқарган эди. Суд унга 140 миллион гривна миқдорида гаров эвазига озодликка чиқиш имкониятини ҳам берган.
Маҳаллий ОАВ маълумотларига кўра, Ермак Зеленскийнинг яқин доирасига кирган тадбиркор Тимур Миндич билан боғлиқ коррупция схемаларида иштирок этган бўлиши мумкин. Тергов материалларида премиум тоифадаги турар жой мажмуаси қурилиши жараёнида 460 миллион гривна миқдоридаги маблағларни легаллаштириш ҳолатлари қайд этилгани айтилмоқда.
Украина коррупцияга қарши кураш органлари маълумотига кўра, айбловлар тасдиқланса, Андрей Ермак 15 йилгача озодликдан маҳрум қилиниши мумкин.
