Ўзбекистон Президенти Қозоғистон раҳбари билан телефон орқали мулоқот қилди

Президент Шавкат Мирзиёев 17-май куни Қозоғистон Президенти Қосим-Жомарт Тоқаев билан телефон орқали мулоқот ўтказди.

 

Суҳбат аввалида Ўзбекистон етакчиси Қозоғистон Президентини таваллуд куни билан самимий табриклаб, унга мустаҳкам соғлиқ, бахт-саодат ҳамда қардош Қозоғистон халқининг тинч ва фаровон ҳаёти йўлидаги давлат фаолиятида улкан муваффақиятлар тилади.

 

Мулоқот давомида Туркий давлатлар ташкилотининг Туркистонда ўтказилган норасмий саммити ҳамда ундаги музокаралар юқори даражада ташкил этилгани ва муваффақиятли ўтказилгани алоҳида қайд этилди. Ушбу тадбирлар иштирокчи давлатлар ўртасидаги ҳамкорликни янги босқичга олиб чиққани таъкидланди.

 

Томонлар Ўзбекистон ва Қозоғистон ўртасидаги яхши қўшничилик, стратегик шериклик ва иттифоқчилик муносабатларини янада мустаҳкамлаш масалаларини муҳокама қилдилар.

 

Шунингдек, икки давлат ўртасидаги ҳамкорлик барча соҳаларда изчил ривожланаётгани мамнуният билан қайд этилди. Яқин истиқболда ўзаро товар айирбошлаш ҳажмини 10 миллиард долларга етказиш, инвестиция лойиҳаларини кенгайтириш, энергетика, транспорт, экология ҳамда маданий-гуманитар йўналишларда ҳамкорликни кучайтириш бўйича ишлар олиб борилаётгани таъкидланди.

 

Бўлажак Ҳукуматларaro комиссия йиғилиши ва Ҳудудлар раҳбарлари кенгашининг биринчи учрашуви доирасида янги иқтисодий кун тартибини шакллантириш масалаларига алоҳида эътибор қаратилди.