Германиялик сайёҳга тармашган лўлилар ҳодисаси Тошкентда бўлгани аниқланди
Самарқандга тегишли кадрлар монтаж ёрдамида қўшилгани аниқланиб, Германияда бўлган фуқаро билан боғланиб тушунтириш олиб борилган.
Ижтимоий тармоқларда Самарқандда бир гуруҳ лўлиларнинг германиялик сайёҳга нисбатан ножўя ҳаракатлари акс этган видео кенг муҳокамаларга сабаб бўлди.
Мазкур ҳолатга Ички ишлар вазирлиги Жамоат хавфсизлиги департаменти ойдинлик киритди.
Қайд этилишича, ўтказилган текширув давомида видеода акс этган воқеа Самарқандда эмас, балки Тошкент шаҳридаги Ҳазрати Имом мажмуаси ҳудудида содир этилгани аниқланган. Шунингдек, видеодаги Самарқанд шаҳри тарихий обидаларига оид лавҳалар монтаж ёрдамида қўшилгани маълум қилинди.
Расмий маълумотларга кўра, ушбу ҳолат 2023 йилда содир бўлган. Видеода акс этган вояга етмаган қизнинг шахсига аниқлик киритилиб, унинг отаси — 1979 йилда туғилган З.М. билан профилактик-тушунтириш ишлари олиб борилган. Унга фарзандини қатъий назорат қилиш ва бундай ҳолатларнинг қайта такрорланишига йўл қўймаслик бўйича огоҳлантириш берилган.
Шунингдек, ёлғон ахборот тарқатиб, жамоатчилик фикрини чалғитишга уринишда гумоин қилинган фуқаро С.Ш.нинг шахси ҳам аниқланган. Маълум қилинишича, у ҳозирда Германия ҳудудида бўлиб турибди. Шу сабабли у билан “WhatsApp” орқали боғланилиб, ёлғон ахборот тарқатиш ва жамоатчилик фикрини чалғитишга уриниш учун қонунчиликда жавобгарлик мавжудлиги юзасидан тушунтириш ишлари олиб борилган.
