Намангандаги видео нотўғри талқин қилинган — Миллий гвардия
Ижтимоий тармоқларда тарқалган “Миллий гвардия ходими ва чет эл фуқароси ўртасидаги тортишув” видеоси юзасидан изоҳ берилди.
Ижтимоий тармоқларда “ўзини чет эл фуқароси деб таништирган шахс ва Миллий гвардия ходимлари ўртасидаги тортишув” мазмунидаги видеотасвир кенг муҳокамаларга сабаб бўлди. Мазкур ҳолат юзасидан Ўзбекистон Миллий гвардияси расмий изоҳ берди.
Маълум қилинишича, воқеа жорий йилнинг 25 февраль куни Наманган шаҳридаги Бобур истироҳат боғи ҳудудида содир бўлган.
Унга кўра, жамоат тартибини сақлаш ва фуқаролар хавфсизлигини таъминлаш мақсадида хизматга жалб этилган гвардиячилар томонидан белгиланган бўлмаган жойда тамаки маҳсулотини истеъмол қилаётган фуқаро тўхтатилган. Суҳбат давомида у ўзини чет эл фуқароси сифатида таништириб, қўпол муомала қилган.
Шунга қарамай, гвардиячилар томонидан унга Ўзбекистон қонунчилигида белгиланган тартиб-қоидалар, хусусан жамоат жойларида тамаки истеъмоли тақиқлангани ҳақида тушунтириш берилган. Ушбу жараён чет эл фуқаросининг шериги томонидан видеога олинган.
Кейинчалик ўтказилган ўрганишлар натижасида ушбу шахс Қозоғистон фуқароси Р. Эргашев экани аниқланган. У билан тушунтириш ишлари олиб борилгач, у ўз хатти-ҳаракатларини тан олган ва тегишли хулоса чиқарганини билдирган.
Шунингдек, расмийлар видеони бузиб талқин қилган ҳолда тарқатиш ҳолатлари жамоатчиликни чалғитиши мумкинлиги ҳақида огоҳлантирган.
