Ўзбекистонда “пробег”ни ўзгартириб сотганлик учун маъмурий жавобгарлик кучайтирилади
Сенат маъмурий жавобгарлик тизимини такомиллаштиришга оид қонунни маъқуллади.
Олий Мажлис Сенатининг навбатдаги ялпи мажлисида “Ўзбекистон Республикасининг Маъмурий жавобгарлик тўғрисидаги кодексига қўшимча ва ўзгартиришлар киритиш ҳақида”ги қонун муҳокама қилиниб, сенаторлар томонидан маъқулланди.
Қонун билан Маъмурий жавобгарлик тўғрисидаги кодексга бир қатор принципиал ўзгартириш ва қўшимчалар киритилмоқда.
Хусусан, иккиламчи автомобиль бозорида учраётган фирибгарлик ҳолатларининг олдини олиш мақсадида кодекс янги 178²-модда билан тўлдирилмоқда. Унга кўра, автотранспорт воситасининг босиб ўтган масофасини кўрсатувчи одометр қурилмаси кўрсаткичлари ўзгартирилгани ёки алмаштирилгани ҳақида харидорни хабардор қилмаганлик учун алоҳида маъмурий жавобгарлик белгиланади.
Қайд этилишича, ушбу норма истеъмолчиларнинг товар ҳақида тўлиқ ва ҳаққоний маълумот олиш ҳуқуқини таъминлаш ҳамда автомобиль бозоридаги ноҳалол амалиётларга чек қўйишга хизмат қилади.
Бундан ташқари, транспорт воситасини бошқариш ёки ов қилиш ҳуқуқидан маҳрум қилиш муддатини қисқартириш тартиби ҳам такомиллаштирилмоқда. Эндиликда бу масала фақат суд томонидан, аниқ белгиланган мезонлар асосида кўриб чиқилади.
Қонунга кўра, агар шахс илгари ушбу имтиёздан фойдаланган бўлса ёки жазо муддати давомида қайта ҳуқуқбузарлик содир этса, унга нисбатан бундай енгиллик қўлланилмайди.
