АҚШдаги масжидда қуролл ҳужум уюштирилди: уч киши ҳалок бўлди

 

АҚШнинг Сан Диего шаҳридаги Сан Диего Ислом маркази ҳудудида содир бўлган қуролли ҳужум оқибатида уч киши ҳалок бўлди. Маҳаллий полиция маълумотига кўра, ҳужумни амалга оширган икки ўсмир кейинчалик ўз жонига қасд қилган. Бу ҳақда ББС хабар берди.

 

Маълум қилинишича, ҳодиса душанба куни эрталаб юз берган. Дастлаб полицияга ўз жонига қасд қилишга мойил бўлиши мумкин бўлган ўсмир ҳақида мурожаат келиб тушган. Орадан кўп ўтмай, Ислом марказида отишма содир бўлгани ҳақида хабар берилган.

 

Воқеа жойига етиб борган ҳуқуқ-тартибот ходимлари бинонинг олд қисмида ўқ жароҳати олган уч кишининг жасадини аниқлаган. Кейинчалик ҳужумчилар масжиддан бир неча блок квартал нарида жойлашган автомобилда ўз жонига қасд қилган ҳолда топилган.

 

Ҳалок бўлганлар орасида марказ қўриқчиси ҳам борлиги айтилмоқда. Скотт Ваҳл унинг ҳаракатларини «қаҳрамонлик» дея баҳолаб, айнан у янада кўпроқ қурбонлар бўлишининг олдини олганини таъкидлаган.

 

Терговчилар ҳодиса сабаблари ҳозирча номаълумлигини билдирган. Бироқ гумондорлардан бирига тегишли ёзувларда нафрат мазмунидаги фикрлар аниқлангани сабабли ҳужум нафратга асосланган жиноят сифатида ҳам ўрганилмоқда.

СBС телеканалига берган гувоҳлар интервьюсида "ярим автоматик қурол"га ўхшаш нарсадан 30 тагача ўқ овози эшитилгани маълум қилинган.

 

Воқеа вақтида Ислом маркази ҳудудидаги мактабда болалар дарс жараёнида бўлган. Ҳодисадан сўнг ўқувчилар хавфсиз ҳудудга эвакуация қилинган, яқин атрофдаги мактабларда эса вақтинчалик карантин чоралари жорий этилган.

 

Калифорния губернатори Гавин Невсом ҳодиса юзасидан муносабат билдириб, оилалар ва болалар йиғиладиган, фуқаролар тинч ва ҳамжиҳатликда ибодат қиладиган марказда содир этилган ҳужум уни чуқур ларзага солганини таъкидлаган. Унинг сўзларига кўра, штат ҳукумати диний жамоаларга қарши қаратилган террор ва қўрқитиш ҳаракатларига мутлақо муросасиз муносабатда бўлади.

 

Айни пайтда, Доналд Трамп ҳам воқеага изоҳ бериб, отишмани “жуда даҳшатли ҳолат” деб баҳолаган.

Оқ уйда журналистлар саволларига жавоб берган Трамп унга ҳодиса бўйича дастлабки маълумотлар етказилганини билдириб, масала жиддий тарзда кўриб чиқилишини қайд этган.