Эбола эпидемияси оқибатида ҳалок бўлганлар сони 131 нафарга етди
Дунё бўйлаб Эбола билан касалланишнинг 500 дан ортиқ гумон қилинган ҳолати қайд этилган.
Жаҳон соғлиқни сақлаш ташкилоти бош директори Тедрос Адҳаном Гебреесус Женевада бўлиб ўтган 79-Жаҳон соғлиқни сақлаш ассамблеясида Эбола касаллиги бўйича сўнгги вазият юзасидан маълумот берди.
Унинг таъкидлашича, дунё бўйлаб Эбола вируси бўйича 500 дан ортиқ гумон қилинган ҳолатлар қайд этилган бўлиб, 131 нафар ўлим ҳолати тасдиқланган.
Вазият энг кескин тарзда Конго Демократик Республикасида кузатилмоқда. Бу ерда вирус бир нечта ҳудудларга тарқалиб, янги ҳолатлар қайд этилмоқда. ЖССТ мутахассислари эпидемия кўлами расмий рақамлардан ҳам юқори бўлиши мумкинлигини билдирмоқда ва вазиятни жиддий хавф сифатида баҳоламоқда.
Шунингдек, қўшни Уганда ҳудудида ҳам инфекция ҳолатлари аниқланган. Айрим қўшни давлатлар чегараларда санитария назоратини кучайтирган.
Мутахассислар Эбола тарқалишини чеклашда асосий омил сифатида контактларни аниқлаш, санитария қоидаларига риоя қилиш ва хавфсиз тиббий чораларни кучайтириш зарурлигини таъкидламоқда.
