Қирғизистон тарихий адолат тикланишига умид қилмоқда — Садир Жапаров
Қирғизистон президенти давлат раҳбарларини мамлакат номзодини БМТ Хавфсизлик Кенгаши аъзолигига қўллаб-қувватлашга чақирди.
Садир Жапаров БМТ Хавфсизлик Кенгашининг доимий бўлмаган аъзолари сайловлари олдидан давлат раҳбарларига мурожаат қилиб, Қирғизистон номзодини қўллаб-қувватлашга чақирди. Бу ҳақда Каzinform хабар берди.
Қирғизистон президенти ўз мурожаатида дунёда геосиёсий кескинлик кучайиб бораётгани, ҳарбий можаролар давом этаётгани ва халқаро тизим тенг ҳуқуқли вакилликка эҳтиёж сезаётганини таъкидлаган.
“Бундай шароитларда БМТга аъзо давлатларнинг Хавфсизлик Кенгашида инклюзив ва тенг ҳуқуқли вакиллиги ҳамда унинг бутун халқаро ҳамжамият номидан қарор қабул қилувчи орган сифатидаги қонунийлигини сақлаб қолиш масаласи биринчи ўринга чиқади”, — деди Жапаров.
Унинг қайд этишича, Қирғизистон бошқа 60 га яқин давлат қатори шу пайтгача ҳеч қачон Бирлашган Миллатлар Ташкилоти Хавфсизлик Кенгаши аъзоси бўлмаган. Шу билан бирга, мамлакатнинг асосий рақиби сифатида кўрилаётган Филиппин аввал тўрт марта Кенгаш таркибидан жой олган.
Қирғизистон раҳбари мамлакатнинг эҳтимолий сайланиши тарихий адолатни тиклаш ва кичик, ривожланаётган ҳамда денгизга чиқиш имконига эга бўлмаган давлатларнинг глобал хавфсизлик масалаларидаги иштирокини кенгайтиришга хизмат қилишини билдирди.
Жапаров, шунингдек, ҳарбий можароларга сарфланаётган харажатлар 3 триллион доллардан ошганини таъкидлаб, ушбу маблағлар экология ва очарчиликка қарши йўналтирилганда, “сайёрани гуллаб-яшнаётган боғга айлантириш мумкин бўлишини” қайд этган.
Баёнотга кўра, Қирғизистон сайланган тақдирда воситачилик механизмларини ривожлантириш, профилактик дипломатияни кучайтириш, ядровий қуролсизланишни қўллаб-қувватлаш ҳамда иқлим ва хавфсизлик масалалари ўртасидаги боғлиқликни мустаҳкамлаш тарафдори бўлади.
Маълумот учун, Бирлашган Миллатлар Ташкилоти Хавфсизлик Кенгаши сайлови 2026 йил 3 июнь куни Нью Ёрк шаҳрида бўлиб ўтади.
