Каттақўрғонда собиқ ҳоким ўринбосари олган порасини қайтараётганида қўлга тушди
Булунғур туманида эса солиқ инспекцияси бошлиғи ўринбосари пора олаётган вақтида ушланди.
Ҳуқуқни муҳофаза қилувчи органлар томонидан Самарқанд вилоятида коррупцияга оид икки ҳолат фош этилди. Бу ҳақда ДХХ Zamon.uz'гa хабар берди.
Биринчи ҳолатда, Булунғур туманида фаолият юритувчи “Бухгалтерия маркази” давлат муассасаси ҳисобчиси қишлоқ хўжалиги маҳсулотлари етиштиришга ихтисослашган фермер хўжалигига ҳисобланган 150 миллион сўмлик солиқ қарздорлигини мансабдор танишлари орқали камайтириб беришни ваъда қилган.
Маълум қилинишича, у фермер хўжалиги раҳбаридан дастлаб 3 миллион сўм олган, кейинчалик эса қўшимча 15 миллион сўм талаб қилган. Тезкор тадбир давомида ушбу маблағни Булунғур тумани солиқ инспекцияси бошлиғи ўринбосари билан биргаликда олаётган вақтида гумонланувчилар ашёвий далиллар билан қўлга олинган.
Иккинчи ҳолатда эса, 2025 йилда Каттақўрғон тумани ҳокими ўринбосари лавозимида ишлаган шахс фуқарони туман тиббиёт бирлашмасига ишга жойлаштириб қўйиш эвазига 14 миллион сўм олгани аниқланган.
Терговга кўра, у ўз ваъдасини бажармаган. Тезкор тадбир давомида собиқ мансабдор муқаддам олган маблағ ҳисобидан 1000 АҚШ долларини қайтараётган вақтида унинг ноқонуний ҳаракатлари фош этилган.
Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
