Ўзбекистонда гидрометеорология ва авиация хавфсизлиги тизими модернизация қилинади
Мамлакатда об-ҳаво маълумотларининг аниқлигини ошириш, хавфли гидрометеорологик ҳодисалар ҳақида эрта огоҳлантириш тизимини такомиллаштириш ва миллий авиация парвозлари хавфсизлигини таъминлашга қаратилган қарор қабул қилинди.
Вазирлар Маҳкамаси томонидан гидрометеорология хизмати инфратузилмасини ривожлантириш ҳамда фуқаролик авиацияси парвозлари хавфсизлигини метеорологик таъминлашни такомиллаштиришга қаратилган 252-сонли қарор қабул қилинди. Бу ҳақда Экология қўмитаси матбуот хизмати хабар берди .
Ҳужжатга мувофиқ, мамлакатда об-ҳаво прогнозларининг аниқлигини ошириш, хавфли гидрометеорологик ҳодисалар ҳақида эрта огоҳлантириш тизимини ривожлантириш ҳамда миллий авиация хавфсизлигини халқаро стандартлар асосида таъминлаш бўйича комплекс чора-тадбирлар белгиланди.
Хусусан, 2027–2028 йилларда Ўзбекистоннинг тоғли ҳудудларида қор қопламини кузатиш учун замонавий масофавий қор ўлчаш станцияларини ўрнатиш ва мавжуд тизимларни янгилаш режаштирилган.
Шунингдек, 2026–2028 йиллар давомида мамлакат аэропортларида автоматик авиация об-ҳаво станцияларини модернизация қилиш дастури амалга оширилади.
Қарор доирасида Хоразм вилоятидаги Урганч халқаро аэропорти ҳудудида авиация об-ҳаво станциясини модернизация қилиш, уни замонавий техник жиҳозлар билан таъминлаш ҳамда зарур инфратузилмани янгилаш ишлари ҳам кўзда тутилган.
Бундан ташқари, учиш-қўниш йўлаги бўйлаб электр таъминоти, алоқа, интернет ва захира генераторлар билан тўлиқ жиҳозланган автоматлаштирилган авиация об-ҳаво станцияларини ўрнатиш белгиланган.
