Ўзбекистонлик тадбиркорнинг Озарбайжонда 80 минг долларни ундириш масаласи ТИВ томонидан кўриб чиқилмоқда
Тадбиркор суд қарорига қарамай, ҳамкор компаниядан маблағни икки йилдан бери ундира олмаётгани билдирган.
Ўзбекистонлик тадбиркорнинг Озарбайжон компанияси билан боғлиқ 80 минг АҚШ доллари миқдоридаги маблағни ундириш масаласи Ташқи ишлар вазирлиги томонидан назоратга олинди. Бу ҳақда вазирлик матбуот хизмати маълум қилди.
Маълум қилинишича, мазкур ҳолат Савдо-саноат палатаси томонидан ташкил этилган очиқ мулоқот давомида кўтарилган. Унда тадбиркор Озарбайжондаги ҳамкор компания томонидан тўлов икки йилдан буён амалга оширилмаётганини, суд қарори мавжуд бўлсада, маблағни ундириш имкони бўлмаётганини билдирган.
Шунингдек, тадбиркор илгари шунга ўхшаш ҳолатларда хорижий компаниялар Ўзбекистондан қарз маблағларини ундиришда Ташқи ишлар вазирлиги аралашуви натижасида масалалар ҳал этилганини ҳам қайд этган.
Унинг сўзларига кўра, элчихонага ҳам мурожаат қилинган, бироқ ҳозирга қадар маблағни ундириш бўйича натижа қайд этилмаган.
Ташқи ишлар вазирлиги муносабатида билдирилишича, Ўзбекистоннинг Озарбайжондаги элчихонаси ушбу масала юзасидан тадбиркор билан доимий алоқада бўлиб, мурожаатнинг дастлабки босқичларидан бошлаб консуллик-ҳуқуқий кўмак кўрсатиб келмоқда.
Қайд этилишича, жараён давомида тадбиркор ва унинг ҳуқуқий вакили ўртасидаги айрим ташкилий масалалар сабабли иш юритишда узилишлар юзага келган.
Айни пайтда элчихона томонидан мазкур масалани қонуний доирада ҳал этиш юзасидан тегишли ишлар давом эттирилмоқда.
Эслатиб ўтамиз, аввалроқ Савдо-саноат палатасидаги учрашувда бир тадбиркор Озарбайжонга экспорт қилган маҳсулоти учун тўловни ололмаётганини айтган ва Ўзбекистон дипломатларининг хориждаги бизнес манфаатларини ҳимоя қилиш даражаси ҳақида савол кўтарилган эди.
