Фарғона ва Наманганда йирик миқдордаги наркотик моддалар мусодара қилинди
Ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
Фарғона ва Наманган вилоятларида наркотик моддаларнинг ноқонуний айланмасига қарши ўтказилган тезкор тадбирларда йирик миқдордаги гиёҳвандлик воситалари ва кучли таъсир қилувчи дори препаратлари аниқланди. Бу ҳақда ДХХ хабар берди.
Маълум қилинишича, Давлат хавфсизлик хизматининг Фарғона вилояти бўйича бошқармаси ходимлари томонидан божхона ва ички ишлар органлари билан ҳамкорликда Фарғона тумани Лоғон маҳалласида жойлашган хонадон кўздан кечирилган.
Текширув давомида ушбу манзилда яшовчи 2000 йилда туғилган фуқарога тегишли 993 грамм «гашиш», 212 грамм «Альфа-ПВП» наркотик моддаси, шунингдек, 2728 дона «Регапен» ва 458 дона «Тропикамид» кучли таъсир қилувчи дори воситалари ашёвий далил сифатида расмийлаштириб олинган.
Шунингдек, Давлат хавфсизлик хизматининг Наманган вилояти бўйича бошқармаси, ички ишлар ва божхона органлари ходимлари ҳамкорлигида ўтказилган тезкор тадбирда «Тошкент–Наманган» йўналишида ҳаракатланаётган «Spark» русумли автомобиль Чуст тумани ҳудудида тўхтатилиб текширилган.
Натижада, унда кетаётган Наманган шаҳрида яшовчи 1992 йилда туғилган шахс ҳамда Давлатобод туманида яшовчи 1997 йилда туғилган фуқародан 1 килограмм 127 грамм «опий» моддаси олинган.
Ҳар икки ҳолат юзасидан жиноят ишлари қўзғатилиб, тергов ҳаракатлари давом эттирилмоқда.
