Наманганда дўл хавфини камайтириш учун булутларга 57 та снаряд отилди
“Ўзгидромет” маълумотига кўра, дўлга қарши ишлар республиканинг бир қатор ҳудудларида тизимли давом этмоқда.
Наманган вилоятининг Косонсой ва Янгиқўрғон туманларида дўл ёғиши хавфини камайтириш мақсадида булутларга махсус таъсир кўрсатиш ишлари амалга оширилди. Бу ҳақда «Ўзгидромет» маълум қилди.
Идора хабарига кўра, жорий йил май ойи бошида ҳудудларда конвектив булутларга таъсир кўрсатилиб, дўл ҳосил бўлиш жараёнларини заифлаштириш бўйича профилактик чоралар кўрилган. Ушбу ишлар 1, 11 ва 12 май кунлари амалга оширилган.
Маълум қилинишича, жараён давомида жами 57 дона «Аlazan-6» туридаги дўлга қарши воситалар қўлланилган.
«Ўзгидромет» мутахассисларининг таъкидлашича, сўнгги йилларда баҳор мавсумида қисқа муддатли кучли ёғингарчиликлар, жала ва дўл ҳодисалари кўпайиб бормоқда. Бунга асосий сабаб сифатида глобал иқлим ўзгаришлари кўрсатилмоқда.
Шунингдек, идора маълумотига кўра, ёғин миқдори кескин ошмаган бўлсада, қисқа вақт ичида интенсив ёғиш ҳолатлари сел ва сув тошқинлари хавфини кучайтирмоқда.
«Ўзгидромет»нинг Гидрометеорологик жараёнларга таъсир кўрсатиш хизмати Наманган, Самарқанд, Қашқадарё ва Сурхондарё вилоятларида дўлга қарши ишларни тизимли равишда олиб бормоқда.
Идора қайд этишича, дўлга қарши чораларга қарамасдан, айрим ҳолларда қисқа муддатли дўл ҳодисалари кузатилиши мумкин.
