Россия қирувчилари Қора денгиз устида Британия разведка самолётига хавфли тарзда яқинлашди
Ҳодисадан сўнг Буюк Британия Ташқи ишлар вазирлиги ва Мудофаа вазирлиги Россия элчихонасидан расмий изоҳ талаб қилди.
Қора денгиз устида Россиянинг икки ҳарбий самолёти Буюк Британия Қироллик ҳаво кучларига қарашли қуролсиз разведка самолётини “хавфли ва провокацион тарзда” тўсиб олди. Бу ҳақда BBC хабар берди.
Британия Мудофаа вазирлиги маълумотига кўра, ҳодиса ўтган ой халқаро ҳаво ҳудудида содир бўлган. НАТО шарқий қанотини кузатиш миссиясини бажараётган RAF'нинг RC-135W Rivet Joint разведка самолётига Россиянинг Су-35 қирувчиси жуда яқин масофада парвоз қилган. Натижада самолётнинг фавқулодда хавфсизлик тизимлари ишга тушиб, автопилот тизими вақтинча ўчган.
Шунингдек, Россиянинг Су-27 қирувчиси Британия самолёти олдидан олти маротаба учиб ўтган. Айрим ҳолатларда у разведка самолёти бурнига атиги олти метр масофагача яқинлашган.
Буюк Британия мудофаа вазири Жон Ҳили RAF экипажининг ҳаракатларини юқори баҳолаб, Россия учувчиларининг бу хатти-ҳаракатларини “қабул қилиб бўлмайдиган” деб атади.
“Бу халқаро ҳаво ҳудудида ҳаракатланаётган қуролсиз самолётга нисбатан хавфли ва масъулиятсиз муносабатнинг яна бир кўринишидир. Бундай ҳаракатлар ҳалокат ва кескинлик хавфини оширади”, — деди Ҳили.
Британия Мудофаа вазирлиги ушбу ҳодисани 2022 йилдан буён Россия томонидан содир этилган энг хавфли ҳаво провокацияларидан бири сифатида баҳоламоқда. Ўша йили ҳам Россия қирувчиси Қора денгиз устидаги RAF'нинг Rivet Joint самолётига ракета учирган эди.
Лондоннинг таъкидлашича, Британия самолёти халқаро қонунларга мувофиқ равишда мунтазам кузатув парвозини амалга ошираётган бўлган. Ҳодисадан сўнг Буюк Британия Ташқи ишлар вазирлиги ва Мудофаа вазирлиги Россия элчихонасидан расмий изоҳ талаб қилган.
Мудофаа вазирлиги сўнгги пайтларда Россиянинг минтақадаги ҳарбий фаоллиги ортиб бораётганини ҳам қайд этди. Хусусан, Шимолий денгиздаги Британия сувости инфратузилмаси яқинида Россия сувости кемалари ҳаракати кузатилаётгани айтилмоқда.
RAF таркибидаги RC-135W Rivet Joint самолётлари илғор разведка технологиялари билан жиҳозланган бўлиб, электромагнит сигналларни аниқлаш ва таҳлил қилиш орқали реал вақт режимида стратегик маълумотлар тўплайди. Самолётлар одатда Линколншир ҳудудидаги авиабазадан парвоз қилади.
