Тошкент метросида ҳаракат интервали 2–3 дақиқагача қисқартирилади
Метро бекатлари сонини 79 тага, линиялар узунлигини эса 103 километрга кенгайтириш режалаштирилган.
Жорий йил 15 май куни Президентнинг “Тошкент метрополитени фаолиятининг самарадорлигини оширишга доир қўшимча чора-тадбирлар тўғрисида”ги ПҚ–191-сон қарори имзоланди. Бу ҳақда Адлия вазирлиги хабар берди.
Ҳужжатга мувофиқ, 2030 йилгача метрополитен тизимини ривожлантириш бўйича асосий мақсад ва вазифалар белгиланди. Унга кўра, кунлик йўловчи ташиш ҳажмини 1,8 миллион нафарга етказиш, метро бекатлари сонини 79 тага, линиялар узунлигини эса 103 километрга кенгайтириш режалаштирилган.
Шунингдек, метро поездлари ҳаракат интервалини 2–3 дақиқагача қисқартириш кўзда тутилган.
2028 йил якунига қадар метро бекатларига кириш жойлари ҳамда ўтиш йўлакларида йўловчилар хавфсизлигини таъминлаган ҳолда венинг автоматлари ва кичик савдо объектларини жойлаштириш режалаштирилган.
Шунингдек, метро бекатлари атрофида “Park & Ride” тизими жорий этилади. Унга кўра, автомобиль тўхташ жойларидан фойдаланган йўловчиларга метро чипталарида чегирмалар бериш ҳамда автотураргоҳ тўловларини метро чиптаси орқали қоплаш механизмлари йўлга қўйилади.
Қарорда, шунингдек, метро туннеллари ва бекатларида хавфсизлик талабларига риоя қилган ҳолда тадбиркорларга аукцион асосида ижара тартибида фаолият юритиш имконияти яратиш ҳам назарда тутилган.
