Сенатор Турсинхан Худайбергенов “Фидокорона хизматлари учун” ордени билан мукофотланди
Мукофот сенаторнинг ижтимоий-сиёсий ҳаётдаги фаол иштироки ҳамда таваллудининг 75 йиллиги муносабати билан берилди.
Ўзбекистон Президенти Шавкат Мирзиёевнинг фармони билан Президентнинг Оролбўйи минтақасини барқарор ривожлантириш масалалари бўйича маслаҳатчиси, сенатор Худайбергенов Турсинхан Айдарович “Фидокорона хизматлари учун” ордени билан мукофотланди.
Фармонда қайд этилишича, у давлат органларидаги кўп йиллик фидокорона меҳнати, мамлакатда амалга оширилаётган кенг кўламли ислоҳотлардаги улкан хизматлари, шунингдек, Оролбўйи минтақасини ривожлантириш, ҳудуд инфратузилмасини яхшилаш, экологик вазиятни соғломлаштириш ва аҳоли муаммоларини ҳал этиш борасидаги самарали фаолияти учун тақдирланган.
Шунингдек, мукофот сенаторнинг ижтимоий-сиёсий ҳаётдаги фаол иштироки ҳамда таваллудининг 75 йиллиги муносабати билан берилгани таъкидланган.
Худайбергенов 2010 йилнинг мартидан 2016 йил декабригача ФВВга раҳбарлик қилган. Ундан сўнг президентнинг жисмоний ва юридик шахслар мурожаатлари билан ишлашни назорат қилиш ва мувофиқлаштириш бўйича давлат маслаҳатчиси лавозимига тайинланган.
