Бекободда “гашиш” савдоси ва “бангихона” ташкил қилган шахслар 8-10 йилга қамалди
Муқаддам судланган аёл қўшни давлатдан наркотик модда олиб киришга уринган вақтида шериклари билан бирга ушланган.
Тошкент вилоятининг Бекобод туманида гиёҳванд моддалар савдоси билан шуғулланган ҳамда «бангихона» ташкил этган жиноий гуруҳ фаолиятига чек қўйилди. Суд ҳукмига кўра, мазкур шахсларга 8 йил 3 ойдан 10 йил 6 ойгача озодликдан маҳрум қилиш жазоси тайинланди. Бу ҳақда ДХХ Zamon.uz'га хабар берди.
Маълум қилинишича, 1999 йилда туғилган, аввал Жиноят кодексининг 112 ва 140-моддалари билан судланган аёл 2025 йил июль ойида қўшни республикага бориб, наркосавдогардан 1 килограмм «гашиш» моддасини 6 минг АҚШ долларига сотиб олиш ҳамда уни Ўзбекистон ҳудудига олиб кириш бўйича келишувга эришган.
Шундан сўнг у «Вҳатсапп» мессенжери орқали гиёҳвандлик воситаси яшириб қолдирилган манзилни олган ва аввал ҳам гиёҳванд моддалар билан боғлиқ жиноятлар учун судланган икки таниши билан Бекобод шаҳри ҳудудидаги дала майдонига борган.
Улар яширин жойдан наркотик моддани олаётган вақтида Давлат хавфсизлик хизмати ва божхона органлари ходимлари томонидан тезкор тадбир давомида ашёвий далиллар билан қўлга олинган.
Экспертиза хулосасига кўра, мусодара қилинган гиёҳвандлик воситасининг соф оғирлиги 985 граммни ташкил этган.
Тергов давомида аниқланишича, аёл ўзининг 1993 йилда туғилган шериги билан Бекобод шаҳрида ижарага олинган хонадонда гиёҳванд моддаларни сотиш ва истеъмол қилиш учун «бангихона» ташкил қилган.
Жиноят ишлари бўйича Бекобод шаҳар судининг ҳукмига кўра, ушбу шахслар Жиноят кодексининг 246 ва 273-моддаларида назарда тутилган жиноятларни содир этганликда айбли деб топилди ҳамда қамоқ жазоси тайинланди.
