Хитой АҚШ босими остида Кубани кучли қўллаб-қувватлашини билдирди
ТИВ вакили Гуо Сзякун Кубага қарши ташқи аралашув ва сиёсий босимларни қабул қилиб бўлмаслигини таъкидлади.
Хитой Ташқи ишлар вазирлиги Кубани ўз миллий суверенитети ва қадр-қимматини ҳимоя қилишда, шунингдек, ташқи аралашувларга қарши туришда қатъий қўллаб-қувватлашини маълум қилди.
Бу ҳақда Хитой Ташқи ишлар вазирлиги вакили Гуо Сзякун вазирликнинг навбатдаги матбуот анжуманида баёнот берди деб хабар берди Синхуа.
Дипломатнинг таъкидлашича, Хитой халқаро ҳуқуқ нормалари ёки БМТ Хавфсизлик Кенгаши мандатисиз жорий этилган бир томонлама санкцияларга доимо қатъий қарши бўлиб келган.
Мазкур баёнот Куба ҳукумати томонидан АҚШнинг Куба инқилоби етакчиларидан бири Раул Кастрога қарши илгари сурилган айбловларнинг кескин рад этилиши фонида янграган. Гуо Сзякун Хитой суд механизмларидан сиёсий босим воситаси сифатида фойдаланиш ҳамда ташқи кучларнинг турли баҳоналар билан Кубага босим ўтказишига қарши эканини қайд этган.
Шунингдек, у АҚШни Кубага қарши санкциялар ва бошқа чеклов чораларини тўхтатишга, куч ишлатиш таҳдидидан воз кечишга чақирди.
Хитой томони Куба билан дўстона алоқаларни мустаҳкамлаш ва мамлакатнинг суверен ҳуқуқларини ҳимоя қилишни бундан буён ҳам қўллаб-қувватлашини билдирган.
