Президент Шавкат Мирзиёев БАА Ҳукумат ишлари бўйича вазирини қабул қилди

 

Президент Шавкат Мирзиёев 22 май куни Бирлашган Араб Амирликлари Ҳукумат ишлари бўйича вазири Муҳаммад бин Абдуллоҳ ал-Гаргавий бошчилигидаги делегацияни қабул қилди.

 

Учрашув аввалида вазир давлат раҳбарига БАА Президенти Шайх Муҳаммад Ол Наҳаён, мамлакат Бош вазири, Вице-президенти ва Дубай Амири Шайх Муҳаммад Ол Мактум ҳамда Вице-президент Шайх Мансур Ол Наҳаённинг самимий саломи ва эзгу тилакларини етказди.

 

Мулоқот чоғида Ўзбекистон ва БАА ўртасидаги дўстлик ҳамда стратегик шериклик муносабатларини янада ривожлантириш, давлат бошқаруви самарадорлигини ошириш ва ушбу соҳада амалга оширилаётган ислоҳотлар натижадорлигини таъминлаш масалалари муҳокама қилинди.

 

Томонлар устувор йўналишларда амалий ҳамкорлик изчил мустаҳкамланаётганини алоҳида мамнуният билан қайд этдилар. Хусусан, давлат хизмати механизмларини такомиллаштиришнинг 10 та асосий йўналиши бўйича қўшма “йўл харитаси” муваффақиятли амалга оширилаётгани таъкидланди.

 

Шунингдек, БААнинг бюрократияни қисқартириш борасидаги илғор тажрибаси асосида махсус лойиҳа офиси ишга туширилгани қайд этилди. “Беш миллион сунъий интеллект етакчилари” таълим дастури доирасида эришилган натижалар ҳам юқори баҳоланди.

 

Учрашув давомида “Давлат органлари фаолияти самарадорлигини баҳолаш” лойиҳаси доирасидаги ташаббусларни кенгайтириш, жумладан, маҳаллий ҳокимият органлари вакилларини ҳам жалб этиш масалалари кўриб чиқилди.

 

Бундан ташқари, умуммиллий китобхонлик ҳаракатини йўлга қўйиш, ёшларни қўллаб-қувватлашга қаратилган лойиҳаларни амалга ошириш, қўшма тараққиёт форумларини ташкил этиш ҳамда Ўзбекистон ривожига хизмат қилувчи стратегик ва консептуал ҳужжатларни ишлаб чиқиш бўйича келишувларга эришилди.