Тошкент вилоятида озиқ-овқат маҳсулотлари орасига яширилган 95 мингдан ортиқ дори воситаси топилди
Қиймати 1,3 миллиард сўм бўлган ноқонуний дори воситалари Қозоғистондан олиб кирилган.
ДХХ Чегара қўшинлари ҳарбий хизматчилари ҳамда божхона органлари ходимлари ҳамкорлигида ўтказилган тезкор тадбир давомида хориждан Ўзбекистонга ноқонуний олиб кирилаётган катта миқдордаги дори воситалари фош этилди. Бу ҳақда ДХХ Zamon.uz'гa хабар берди.
Маълум қилинишича, Қозоғистондан Тошкент вилоятининг Қибрай туманида жойлашган “С. Нажимов” чегара божхона пости орқали кириб келган юк автомашинаси божхона назоратидан ўтказилган. Фарғона вилоятининг Олтиариқ туманида яшовчи, 1973 йилда туғилган фуқаро бошқарувидаги мазкур транспорт воситаси текширилганда, озиқ-овқат маҳсулотлари орасига яширилган 52 турдаги жами 95 минг 369 дона тиббий буюм ва дори воситалари борлиги аниқланган.
Шундан сўнг тезкор тадбир давом эттирилиб, ноқонуний юкларни қабул қилиб олаётган вақтида Тошкент туманида яшовчи, 1986 йилда туғилган шахс ҳам ашёвий далиллар билан қўлга олинган.
Тегишли баҳолаш хулосаларига кўра, мусодара қилинган тиббий воситаларнинг умумий қиймати 1 миллиард 323 миллион сўмни ташкил этади.
Мазкур ҳолат юзасидан жиноят иши қўзғатилиб, ҳозирда тергов ҳаракатлари олиб борилмоқда.
