Ўзбекистонда илк бор робот ёрдамида масофавий жарроҳлик амалиёти ўтказилди
Операцияни Республика ихтисослаштирилган жарроҳлик илмий-амалий тиббиёт маркази мутахассиси Хитойдан туриб ўтказди.
Ўзбекистонда илк бор робот ёрдамида масофавий жарроҳлик амалиёти муваффақиятли амалга оширилди. Бу ҳақда Соғлиқни сақлаш вазирлиги матбуот хизмати маълум қилди.
Қайд этилишича, юқори технологияли операция Республика ихтисослаштирилган жарроҳлик илмий-амалий тиббиёт маркази мутахассиси Абдурашид Абдукаримов томонидан Хитойдан туриб бажарилган.
Мутахассисларнинг таъкидлашича, робот-жарроҳлик тизими шифокорга энг мураккаб ва нозик ҳаракатларни юқори аниқликда бажариш имконини беради. Ушбу технология беморга камроқ жароҳат етказиш, операциядан кейинги тикланиш жараёнини тезлаштириш ҳамда тиббий хизмат сифатини оширишда муҳим аҳамият касб этади.
Шунингдек, масофавий робот операцияси замонавий тиббиётда географик масофалар эндиликда тўсиқ эмаслигини яна бир бор намоён этди. Энди бир давлатда бўлган мутахассис бошқа мамлакатдаги беморда мураккаб жарроҳлик амалиётини масофадан туриб бажариши мумкин.
