Андижонда таълим муассасаси директори 10 минг доллар пора билан қўлга тушди
Шунингдек, ноқонуний ер савдоси ҳолати билан боғлиқ бир нечта мансабдор шахслар қўлга олинди.
Андижон вилоятида ноқонуний ер савдоси ва коррупцион ҳолатлар билан боғлиқ бир нечта мансабдор шахслар қўлга олинди. Бу ҳақда ДХХ Zamon.uz'гa хабар берди.
Маълум қилинишича, Фарғона водийси магистраль каналлардан фойдаланиш бошқармасининг 2-Шаҳрихон бўлими 3-гидроучасткаси бошлиғи чорвачилик фаолиятини йўлга қўймоқчи бўлган фуқарога Катта Фарғона канали ҳимоя ҳудудидаги 30 сотих ер майдонини ижара асосида расмийлаштириб бериш эвазига 40,5 минг АҚШ доллари талаб қилган.
У Давлат хавфсизлик хизмати Андижон вилояти бошқармаси ҳамда Бош прокуратура ҳузуридаги Департамент ходимлари томонидан олдиндан 20 минг доллар олган вақтида ашёвий далиллар билан ушланган.
Тезкор тадбир давомида ушбу ноқонуний ҳолатга Фарғона водийси магистраль каналлардан фойдаланиш бошқармаси бўлим бошлиғи ҳам алоқадор экани аниқланиб, у 20 минг доллардан 3 минг доллар олган вақтида қўлга тушди.
Шунингдек, мазкур ер майдонидан ижара асосида фойдаланиб келаётган 3-гидроучастка ходими ҳам ер ажратиб бериш эвазига 19 минг АҚШ доллари талаб қилгани аниқланиб, ҳолат тегишли тартибда расмийлаштирилган.
Бундан ташқари, Олтинкўл туманидаги таълим муассасаси директори ҳам хизмат мавқеидан фойдаланиб, муассаса ҳудудидаги 1,1 гектар ер майдони бўйича келишув шартномасини тасдиқлаб бериш эвазига 15 минг АҚШ доллари талаб қилган. У олдиндан 10 минг доллар олган вақтида ҳуқуқни муҳофаза қилувчи органлар томонидан ушланган.
Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
