Бангладешда қизамиқ эпидемияси: қурбонлар сони 500 нафардан ошди
2026 йил 15 мартдан 23 майгача мамлакат бўйлаб 62 мингдан ортиқ кишида қизамиқ аломатлари аниқланган.
Бангладешда қизамиқ оқибатида вафот этганлар сони 500 нафардан ошди. Бу ҳақда Reuters хабар берди.
Мамлакат соғлиқни сақлаш масъулларига кўра, вафот этганларнинг 86 нафарида қизамиқ инфекцияси тасдиқланган, 426 нафар болада касалликка хос аломатлар кузатилган.
Қайд этилишича, сўнгги ойларда касаллик ҳолатлари кескин ошиб, шифохоналар фаолиятига жиддий босим туширмоқда. Айниқса, қишлоқ ҳудудлари ҳамда кам таъминланган аҳоли зич яшайдиган шаҳарларда вазият оғирлашган.
Бангладеш Соғлиқни сақлаш хизматлари бош бошқармаси маълумотларига кўра, 15 мартдан 23 майгача мамлакат бўйлаб 62 мингдан ортиқ кишида қизамиқ аломатлари аниқланган. Шундан 8,4 мингдан зиёди лаборатория орқали тасдиқланган.
Мутахассислар беш ёшгача бўлган болалар энг юқори хавф остида эканини таъкидламоқда. Айниқса, эмланмаган ёки тўлиқ вакцина олмаган болаларда касаллик оғир кечаётгани қайд этилган.
Жаҳон соғлиқни сақлаш ташкилоти аввалроқ мунтазам эмлаш даражасининг пасайиши кенг кўламли эпидемия хавфини кучайтирганини билдирган.
Шундан сўнг Бангладеш ҳукумати фавқулодда қизамиқ-қизилча вакцинацияси кампанияларини кенгайтириб, тезкор тиббий гуруҳларни сафарбар қилган. Шунингдек, касаллик асоратларини камайтириш учун А витамини тарқатиш ҳажми ҳам оширилган.
“Қизамиқ дунёдаги энг юқумли касалликлардан бири бўлса-да, вакцинанинг икки дозаси орқали унинг олдини олиш мумкин”, дейилади хабарда.
Апрель ойи бошида Бангладеш Cоғлиқни сақлаш вазирлиги камида 98 нафар бола қизамиқ касаллиги оқибатида вафот этганини маълум қилганди.
