Ўзбекистон ва Қатар ҳарбий ҳамкорлик бўйича меморандум имзолади
Доҳада икки давлат мудофаа вазирлари ўртасида музокаралар бўлиб ўтди.
Ўзбекистон Республикаси мудофаа вазири генерал-лейтенант Шухрат Халмухамедов бошчилигидаги делегация расмий ташриф билан Доҳа шаҳрида бўлди. Бу ҳақда вазирлик матбуот хизмати хабар берди.
Ташриф доирасида Ўзбекистон мудофаа вазири Қатар Бош вазир ўринбосари ва мудофаа ишлари бўйича давлат вазири Шайх Сауд бин Абдулраҳман бин Ҳассан Ал Тани билан учрашув ўтказди.
Мулоқот давомида минтақадаги хавфсизлик соҳасидаги сўнгги вазият ва долзарб масалалар муҳокама қилиниб, мавжуд шароитлардан келиб чиқиб ҳарбий ҳамкорликни янада ривожлантириш ҳамда қўшма мувофиқлаштириш йўналишлари кўриб чиқилди.
Учрашув якунида Ўзбекистон ва Қатар ўртасида ҳарбий ҳамкорлик бўйича ўзаро англашув меморандуми имзоланди.
