Бухорода туман соғлиқни сақлаш бўлими раҳбари пора билан қўлга тушди
У тиббий харидлар бўйича тузилган шартнома маблағларни ўтказиб бериш эвазига 150 миллион сўм миқдорида “улуш” талаб қилган.
Бухоро вилоятида туман соғлиқни сақлаш бўлими раҳбари пора олиш билан боғлиқ жиноят устида қўлга олинди. Бу ҳақда ДХХ Zamon.uz'гa маълум қилди.
Қайд этилишича, жорий йилда туман соғлиқни сақлаш бўлими ҳамда дори-дармон ва тиббий буюмлар етказиб берувчи МЧЖ ўртасида 1 миллиард 2 миллион сўмлик шартнома тузилган. Дастлаб маблағларнинг 30 фоизи МЧЖ ҳисоб рақамига ўтказилган.
Шундан сўнг, туман соғлиқни сақлаш бўлими раҳбари қолган маблағларни ўтказиб бериш ва келгусидаги харидларни ҳам мазкур МЧЖ орқали амалга ошириш эвазига шартнома қийматининг 15 фоизи — 150 миллион сўм миқдорида «улуш» талаб қилганлиги аниқланган.
ДХХ ходимлари томонидан ўтказилган тезкор тадбир давомида мансабдор шахс талаб қилинган пул маблағидан 11 800 АҚШ долларини ўз турмуш ўртоғи орқали олаётган вақтида ушланган.
Шунингдек, у туман миқёсидаги оилавий поликлиникалар учун ажратилган 448 миллион сўмлик рағбатлантириш маблағларининг ярмини қайтариш шарти билан қайта йиғиб олганлиги ҳам аниқланган.
Мазкур ҳолат юзасидан соғлиқни сақлаш бўлими бошлиғига нисбатан Жиноят кодексининг 210-моддаси (пора олиш) ҳамда 167-моддаси (ўзлаштириш ёки растрата йўли билан талон-торож қилиш) билан, МЧЖ вакилига эса 211-моддаси (пора бериш) билан жиноят иши қўзғатилиб, тергов ҳаракатлари давом эттирилмоқда.
