Конгода Эбола қурбонлари сони 200 дан ошди
Мамлакатда 867 та гумон қилинган инфекция ҳолати қайд этилган.
Конго Демократик Республикасида (КДР) Эбола вирусидан вафот этганлар сони 204 кишига етди. Бу ҳақда мамлакат Алоқа ва оммавий ахборот воситалари вазирлиги маълум қилди.
Расмий маълумотларга кўра, мамлакатнинг шарқий қисмидаги Итури, Шимолий Киву ва Жанубий Киву провинцияларида жами 867 та гумон қилинган инфекция ҳолати қайд этилган. Шундан 10 та ўлим ва 91 та ҳолат лаборатория таҳлиллари орқали тасдиқланган.
Эпидемиянинг асосий маркази Уганда билан чегарадош Итури провинцияси экани билдирилмоқда. Мутахассислар вирус аҳоли орасида бир неча ҳафта аввалдан тарқалган бўлиши мумкинлигини истисно қилмаяпти.
Жаҳон соғлиқни сақлаш ташкилоти аввалроқ ушбу эпидемия ҳолатини халқаро миқёсдаги соғлиқни сақлаш фавқулодда ҳолати деб эълон қилган эди.
Шунингдек, қўшни давлатлар — Уганда, Замбия, Бурунди, Танзания ва Руанда томонидан ҳам эпидемияга қарши кураш чоралари кучайтирилган. Россия томони эса эпидемия тарқалишини жиловлашда халқаро ҳамкорлик доирасида ёрдам кўрсатишга тайёрлигини билдирган.
