АҚШ Ҳормуз бўғозида Эрон объектларига ҳужум уюштирди

 

АҚШ ҳарбийлари Эрон жанубидаги айрим ҳарбий нишонларга зарба берганини маълум қилинди. Бу ҳақда АҚШ Марказий қўмондонлиги вакили капитан Тим Хокинснинг баёнотига таяниб Fox News хабар берди.

АҚШ ҳарбийлари баёнотига кўра, зарбалар “ўзини ҳимоя қилиш” мақсадида амалга оширилган. Нишонлар сифатида ракета учириш қурилмалари ҳамда Ҳормуз бўғозида миналар жойлаштиришга уринган Эрон қайиқлари кўрсатилган.

“Бугун АҚШ кучлари Эрон кучларининг таҳдидларидан ҳарбийларимизни ҳимоя қилиш мақсадида Эрон жанубида мудофаа характеридаги зарбаларни амалга оширди”, — дейилади баёнотда.

Fox News маълумотига кўра, АҚШнинг юқори лавозимли расмийси Ҳормуз бўғозида Ислом инқилоби қўриқчилари корпусига тегишли иккита кеманинг йўқ қилинганини билдирган. Шунингдек, Бандар Аббос портида жойлашган ер-ҳаво ракета тизимига ҳам зарба берилгани айтилмоқда. АҚШ томони ушбу тизим Америка ҳарбий самолётларини нишонга олганини даъво қилган.

АҚШ вакиллари ҳужумлар сулҳни бузишга қаратилмаганини таъкидлаб, Вашингтон Эрон билан амалдаги сулҳ доирасида “вазминлик сиёсатини” давом эттираётганини билдирган.

Женнифер Гриффиннинг ёзишича, АҚШ зарбалари якунланган ва улар ҳужумкор эмас, балки мудофаа мақсадида амалга оширилган.

Эроннинг Тасним ахборот агентлиги эса Бандар Аббос ҳудудида камида учта портлаш овози эшитилганини маълум қилган.

Эслатиб ўтамиз, АҚШ ва Эрон ўртасида апрель ойида сулҳ эълон қилинган эди. Кейинчалик АҚШ президенти Доналд Трамп ушбу сулҳ муддатини номаълум вақтга узайтирганини билдирган. Шунга қарамай, май ойида Ҳормуз бўғози ҳудудида икки томон ўртасида яна ҳарбий тўқнашувлар юз берган эди.