Махсус комиссия Тошкентда қисқа муддатли чанг-тўзон ҳодисалари юзасидан огоҳлантирди
Айрим жойларда шамол 15 метр/секундгача кучайиши мумкин.
Жаҳон метеорология ташкилотининг Чанг-қум бўронлари бўйича Пекин ва Саудия Арабистони регионал марказлари ҳамда Ўзбекистон Гидрометеорология хизмати агентлиги прогнозларига кўра, эртага пойтахт ҳудудига ғарбий нам ҳаво оқимлари кириб келиши олдидан айрим ҳудудларда чанг-тўзон ҳодисалари юз бериши эҳтимоли мавжуд.
Прогнозларга кўра, кун давомида об-ҳаво ўзгарувчан бўлади, айрим жойларда қисқа муддатли ёмғир ёғиши ва момақалдироқ кузатилиши мумкин. Шамол асосан ғарбдан 3–8 метр/секунд тезликда эсади. Айрим ҳудудларда шамол тезлиги 10–12 метр/секундгача, баъзи жойларда эса 15 метр/секундгача кучайиши мумкин.
Мутахассислар маълумотига кўра, кучли шамол фонида айрим ҳудудларда чанг-тўзонлар юзага келиши ҳамда атмосфера ҳавосида чанг заррачалари, хусусан PМ10 концентрацияси қисқа муддатга ошиши эҳтимоли мавжуд.
Шу билан бирга, ушбу ҳолат қисқа муддатли характерга эга экани, ғарбий нам ҳаво оқимлари ва ёғингарчилик сабаб атмосфера ҳавоси аста-секин тозаланиши кутилаётгани таъкидланди.
Мутахассислар шамол кучайган пайтларда, айниқса нафас йўллари касалликлари, аллергия ёки юрак-қон томир тизими билан боғлиқ муаммолари мавжуд фуқароларга эҳтиёт чораларини кўришни тавсия этди. Зарурат бўлмаганда узоқ вақт очиқ ҳавода бўлмаслик, дераза ва эшикларни ёпиқ сақлаш ҳамда имкон қадар ниқоблардан фойдаланиш мақсадга мувофиқ экани билдирилди.
Ҳозирда атмосфера ҳавоси ҳолати Махсус комиссия томонидан доимий мониторинг қилинмоқда.
