Россия ТИВ хорижликларни Киевни тарк этишга чақирди
Шунингдек, Украина пойтахти аҳолиси ҳарбий ва маъмурий инфратузилма объектларига яқинлашмасликка чақирилди.
Россия Ташқи ишлар вазирлиги хорижий фуқаролар, дипломатик миссиялар ҳамда халқаро ташкилотлар ваколатхоналари ходимларига имкон қадар тезроқ Киевни тарк этишни тавсия қилди.
Вазирлик баёнотида, шунингдек, Украина пойтахти аҳолиси Владимир Зеленский маъмуриятининг ҳарбий ва маъмурий инфратузилма объектларига яқинлашмасликка чақирилган.
Россия ТИВ маълумотига кўра, Россия Қуролли Кучлари Киевдаги Украина ҳарбий-саноат мажмуаси билан боғлиқ объектларга тизимли зарбалар беришни бошламоқда. Баёнотда НАТО мутахассислари кўмагида фойдаланилаётган учувчисиз учиш аппаратларини лойиҳалаш, ишлаб чиқариш, дастурлаш ва қўллашга тайёрлаш билан боғлиқ объектлар нишонга олиниши қайд этилган.
Шунингдек, Россия томони НАТО мутахассислари дронлар учун бутловчи қисмлар етказиб бериш, разведка маълумотларини тақдим этиш ҳамда нишонларни белгилаш билан шуғулланаётганини таъкидлаган.
“Зарбалар қарорлар қабул қилиш марказлари ва қўмондонлик пунктларига ҳам берилади”, — дейилади Россия ТИВ баёнотида.
Вазирлик ушбу объектлар Киевнинг турли ҳудудларида жойлашганини маълум қилган.
Аввалроқ Россия ТИВ Старобелскдаги терактдан сўнг Украина ҳарбий-саноат мажмуаси объектларига нисбатан тизимли зарбалар берилиши ҳақида огоҳлантирганди.
Эслатиб ўтамиз, Украина Қуролли кучларининг ЛХР ҳудудидаги Старобелск шаҳрида жойлашган коллеж биносига берган зарбаси оқибатида 21 киши ҳалок бўлгани хабар қилинган эди.
