Тошкентда пуллик автомобиль йўллари қурилади
Пойтахтда 100 км га яқин ҳалқа ва янги аэропорт йўналишида пуллик йўллар қуриш лойиҳаси Хитой компанияси билан муҳокама қилинди.
Хитойга амалга оширилган расмий ташриф доирасида Тошкент шаҳар ҳокими Шавкат Умурзаков бошчилигидаги делегация “China Railway Construction Corporation” раҳбарияти билан учрашув ўтказди. Бу ҳақда Тошкент шаҳар ҳокимлиги матбуот хизмати хабар берди.
Музокаралар чоғида пойтахтнинг транспорт ва шаҳарсозлик инфратузилмасини ривожлантириш, комплекс реновация қилиш ҳамда экологик стандартларга мос замонавий ечимларни жорий этиш масалалари кўриб чиқилган.
Томонлар Тошкент шаҳрида қўшимча пуллик автомобиль йўлларини барпо этиш лойиҳаларини муҳокама қилган. Хусусан, тахминан 100 километр узунликдаги ҳалқа йўл ҳамда келгусида қурилиши режалаштирилаётган янги халқаро аэропорт йўналишида шаҳарнинг марказий қисмидан ўтувчи магистраль пуллик йўл қуриш имкониятлари кўриб чиқилган.
Шунингдек, учрашувда “China Railway Construction Corporation” компаниясининг тажрибаси асосида ижтимоий инфратузилма объектлари — замонавий мактаблар, болалар боғчалари, тиббиёт муассасалари ҳамда бошқа ижтимоий аҳамиятга эга иншоотларни барпо этиш бўйича ҳам ҳамкорлик масалалари муҳокама қилинган.
