Тошкентдаги 119 та масжидда Қурбон ҳайити намози ўқилади
Шу сабабли 26 май соат 24:00 дан 27 май 08:00 га қадар пойтахтнинг қатор кўчаларида автомобиллар ҳаракати вақтинча чекланади.
Ўзбекистон Мусулмонлари идорасининг жорий йилда муборак Қурбон ҳайитининг биринчи куни 27 май, чоршанба кунига тўғри келиши ҳақидаги ахбороти асосида пойтахтдаги 119 та масжидда ҳайит намозлари адо этилиши кутилмоқда. Б у ҳақда Тошкент шаҳар ИИББ матбуот хизмати хабар берди.
Ҳайит намозларини юқори савияда ва тартибли ташкил этиш, жамоат хавфсизлигини таъминлаш ҳамда фуқаролар учун қулай шароит яратиш мақсадида 26 май соат 24:00 дан 27 май соат 08:00 га қадар Тошкент шаҳрининг қатор кўчаларида автомобиллар ҳаракати вақтинча чекланади.
Хусусан, Мирзо Улуғбек, Бектемир, Олмазор, Шайхонтоҳур, Чилонзор, Учтепа, Юнусобод, Яккасарой, Сергели, Яшнобод ва Миробод туманларидаги йирик масжидлар атрофидаги асосий кўчаларда транспорт ҳаракати вақтинчалик тўхтатилади.
Чекловлар «Тўрабува», «Хўтан», «Алибек», «Исломобод», “Ҳазрати Имом”, «Дўстжонбой», “Шайх Зайниддин”, “Хўжа Аламбардор”, “Кўк ота”, “Убай ибн Каъб”, “Шайх Муҳаммад Содиқ Муҳаммад Юсуф”, «Новза», “Абдуллоҳ ибн Масъуд”, “Ҳазрати Али”, «Минор», “Мирзо Юсуф”, “Усмон бин Маъзун”, “Нурул Ислом”, “Ислом ота” ҳамда “Қўйлиқ ота” масжидлари яқинидаги кўчаларда амал қилади.
Шунингдек, 27 май куни Қурбон ҳайити муносабати билан пойтахт жамоат транспортлари ўз фаолиятини тонгги соат 04:00 дан бошлайди.
