Тошкентда реклама тахталарини ноқонуний олиб қўйган ходимлар жавобгарликка тортилди
Бизнес-омбудсман аралашувидан сўнг плакатлар тадбиркорларга қайтарилди.
Тошкент шаҳрида айрим тадбиркорларга тегишли кўчма реклама тахталарини ноқонуний олиб кетган ходимлар маъмурий жавобгарликка тортилди. Бу ҳақда Бизнес-омбудсман маълум қилди.
Қайд этилишича, ижтимоий тармоқларда тадбиркорлик субъектларининг реклама тахталари огоҳлантиришсиз олиб кетилгани ҳақидаги хабарлар тарқалганидан сўнг ҳолат назоратга олинган.
Ўрганишлар давомида Яккасарой туманида фаолият юритувчи “Ч.З.” МЧЖ ва бошқа тадбиркорларга тегишли реклама тахталари туман Ободонлаштириш бошқармаси ходимлари томонидан асоссиз равишда йиғиштириб олиб кетилгани аниқланган.
Бизнес-омбудсман аралашувидан сўнг реклама плакатлари тадбиркорларга қайтарилди. Ноқонуний ҳаракатларга йўл қўйган Ободонлаштириш бошқармасининг икки нафар масъул ходими эса маъмурий жавобгарликка тортилган.
Бизнес-омбудсман тадбиркорлик субъектларининг мулки қонун билан ҳимоя қилиниши ва унга ноқонуний аралашув маъмурий ёки жиноий жавобгарликка сабаб бўлишини эслатиб ўтди.
