Эбола сабаб Канадага кириш тақиқланмоқда

Канада ҳукумати Эбола вируси тарқалиши сабабли мамлакатга кириш ва иммиграция тартибларига вақтинчалик чекловлар жорий этилишини маълум қилди.

 

Канада ҳукумати баёнотига кўра, 27 майдан бошлаб Эбола хавфи юқори ёки жуда юқори деб баҳоланаётган давлатлар фуқаролари учун айрим иммиграция ҳужжатлари 90 кун муддатга тўхтатилади. 

 

Ушбу рўйхатга ҳозирча Конго Демократик Республикаси, Уганда ва Жанубий Судан киритилган.Канада ҳукумати маълумотига кўра, аввал тасдиқланган вақтинчалик яшаш визалари, электрон саёҳат рухсатномалари ёки доимий яшаш визаларига эга бўлган шахслар ҳам мазкур чекловлар даврида мамлакатга кириш имкониятидан маҳрум бўлади.

 

Шунингдек, ушбу давлатларда сўнгги уч ҳафта давомида бўлган Канада фуқаролари, доимий резидентлар ва бошқа хорижий фуқаролар 21 кун давомида ўзини ўзи карантинда сақлаши шартлиги билдирилган. Агар саёҳатчиларда изоляция учун хавфсиз жой бўлмаса, уларга махсус турар жой ажратилиши қайд этилган.

 

Касаллик аломатлари аниқланган шахслар эса қўшимча текширув учун тиббиёт муассасаларида изоляция қилинади. Мазкур чоралар 30 майдан 29 августга қадар амал қилиши режалаштирилган.Ҳукумат баёнотида мамлакат жамоатчилиги учун хавф даражаси ҳозирча паст экани, бироқ Эбола вирусининг хавфлилиги ҳамда халқаро эпидемиологик вазият, жумладан 2026-йилги ФИФА Жаҳон чемпионати ҳисобга олиниб, эҳтиёт чоралар кучайтирилаётгани таъкидланган.

 

Расмийларга кўра, Канадада ҳозиргача Эбола вирусининг импорт қилинган ҳолати қайд этилмаган ва айни пайтда Шимолий Америкада ҳам касаллик ҳолатлари аниқланмаган.