Францияда Чемпионлар лигаси финалидан кейинги тартибсизликлар сабаб юзлаб одамлар ҳибсга олинди
Футбол мухлислари ва полиция ўртасидаги тўқнашувларда жами 219 киши жароҳатланган. Улардан саккиз нафари оғир аҳволда.
Францияда “Пари Сен-Жермен” (ПСЖ) футбол клубининг Чемпионлар лигаси финалидаги ғалабасидан сўнг юз берган оммавий тартибсизликлар оқибатида юзлаб одамлар қўлга олинди. Бу ҳақда BBC хабар берди.
Франция ички ишлар вазири Лоран Нунеснинг маълум қилишича, мамлакат бўйлаб футбол мухлислари ва полиция ўртасидаги тўқнашувларда жами 219 киши жароҳатланган. Улардан саккиз нафари оғир аҳволда. Шунингдек, 57 нафар полиция ходими ҳам тан жароҳати олган.
Расмий маълумотларга кўра, зўравонликлар билан боғлиқ ҳолатлар юзасидан 780 киши қўлга олинган, улардан 450 нафардан ортиғи ҳибсда сақланмоқда.
Тартибсизликлар асосан Париж шаҳрида кузатилган. Мухлислар кўчаларда машъалалар ёқиб, айрим дўконларга зарар етказган. Вазиятни назорат қилиш учун полиция кўздан ёш оқизувчи газ қўллаган.
Ҳодисалар оқибатида Париж айланма йўли яқинида бир киши ҳалок бўлган. Айрим маълумотларга кўра, 24 ёшли йигит мотоциклда ҳаракатланаётиб бетон тўсиққа урилган. Шунингдек, шаҳарнинг бошқа ҳудудида содир бўлган муштлашув натижасида бир ўсмир оғир аҳволда қолмоқда.
Парижда ўтказилган ғалаба парадининг хавфсизлигини таъминлаш учун 6 минг нафар полициячи сафарбар этилди. Байрам тадбирлари Эйфел минораси атрофида ва шаҳар марказида давом этди.
Франция ички ишлар вазирлиги тартибсизликларни келтириб чиқарганларнинг аксарияти футбол мухлислари эмаслигини таъкидлаб, жамоат тартибини бузишга уринган шахсларга нисбатан қатъий чоралар кўрилишини маълум қилди.
