Сергели автомобиль бозори бузилмайди — ҳокимлик
Бозорда кенг кўламли модернизация ва ободонлаштириш ишлари амалга оширилмоқда.
Сергели автомобиль бозори ўз фаолиятини одатий тартибда давом эттирмоқда ва унинг бузилиши ёки ёпилиши ҳақидаги хабарлар ҳақиқатга мос келмайди. Бу ҳақда туман ҳокимлиги хабар берди.
Маълум қилинишича, автомобиль бозори ҳудудида сотувчилар, харидорлар ҳамда ташриф буюрувчилар учун қулай шароитларни янада яхшилашга қаратилган кенг кўламли модернизация ва ободонлаштириш ишлари амалга оширилмоқда.
Олиб борилаётган ишларнинг асосий мақсади бозор инфратузилмасини янгилаш, хавфсиз, замонавий ва тартибли савдо муҳитини яратиш, шунингдек, аҳолига кўрсатилаётган хизматлар сифатини оширишдан иборат.
Модернизация ишлари доирасида бозор маъмурий биноларининг кириш қисмлари янгиланмоқда ҳамда гранит плиталар ётқизилмоқда. Шу билан бирга, ҳудуднинг 26 500 квадрат метр майдонига янги асфальт қопламаси ётқизилган бўлиб, қўшимча 16 200 квадрат метр майдонни асфалтлаш режалаштирилган.
Шунингдек, эҳтиёт қисмлар савдоси амалга ошириладиган дўконларнинг том қисмларини янгилаш ишлари олиб борилмоқда. Ҳудуддаги тартибсиз жойлаштирилган реклама конструксиялари демонтаж қилиниб, савдо нуқталарининг ташқи кўриниши тартибга келтирилмоқда. Фойдаланилган эҳтиёт қисмлар сотиладиган контейнерлар ҳам замонавий ва тартибли кўринишга келтирилмоқда.
Бундан ташқари, бозор ҳудудига автомототранспорт воситаларининг кириши учун инсон омилисиз ишловчи автоматлаштирилган тўлов тизимлари ўрнатилмоқда.
Ҳокимлик мазкур ишлар бозор фаолиятини тўхтатиш билан боғлиқ эмаслигини алоҳида таъкидлаб, аксинча, бу ташаббуслар ҳудудни ривожлантириш, тадбиркорлар учун шароитларни яхшилаш ҳамда пойтахт аҳолиси учун янада қулай савдо муҳитини яратишга хизмат қилишини қайд этди.
