Ўзбекистонда чанг-тўзон ва кучли шамол бўйича огоҳлантириш берилди

 

Махсус комиссия бугун республика ҳудудида, хусусан, Тошкент шаҳри ва бир қатор вилоятларда қисқа муддатли чанг-тўзон ҳодисалари кузатилиши мумкинлиги юзасидан огоҳлантирди.

 

Жаҳон метеорология ташкилотининг Чанг-қум бўронлари бўйича Пекин минтақавий маркази ҳамда Ўзгидромет прогнозларига кўра, Қорақалпоғистон Республикаси, Бухоро, Навоий, Тошкент, Жиззах, Сирдарё ва Сурхондарё вилоятларида нам ҳаво оқимлари кириб келиши арафасида қисқа муддатли чанг-тўзонлар юзага келиши эҳтимоли мавжуд.

 

Прогнозларга мувофиқ, кун давомида об-ҳаво ўзгарувчан бўлиб, айрим ҳудудларда қисқа муддатли ёмғир ва момақалдироқ кузатилиши кутилмоқда. Шамол тезлиги 10–12 м/с гача, баъзи ҳудудларда эса 12–18 м/с гача кучайиши мумкин. Шамол кучайиши фонида чанг-тўзонлар вақтинча юзага келиши эҳтимоли бор.

 

Қайд этилишича, мазкур жараёнлар натижасида атмосфера ҳавосида, хусусан PМ10 чанг заррачалари миқдори қисқа муддатга ортиши мумкин. Бироқ бу ҳолат вақтинчалик бўлиб, куннинг иккинчи ярмида кутилаётган қисқа муддатли ёғингарчилик ҳисобига ҳаво аста-секин тозаланиши прогноз қилинмоқда.

 

Мутахассислар шамол кучайган пайтларда, айниқса нафас йўллари касалликлари, аллергик ва юрак-қон томир хасталиклари мавжуд фуқароларга эҳтиёт чораларини кўришни тавсия этади. Зарурат бўлмаганда очиқ ҳавода узоқ вақт бўлмаслик, дераза ва эшикларни ёпиқ сақлаш ҳамда ҳимоя ниқобларидан фойдаланиш тавсия этилади.

 

Ҳозирда атмосфера ҳавоси ҳолати Махсус комиссия томонидан доимий мониторинг қилиниб, вазият назорат остида сақланмоқда.