Фарғонада 2 килограммдан ортиқ гашишни сотмоқчи бўлган шахс ушланди
Гумонланувчи ушбу гиёҳвандлик воситаларини Қирғизистон ҳудудидаги жиноий шеригидан қабул қилиб олган ва уларни Қўқон шаҳрида сотишни режалаштирган.
Фарғонада контрабанда йўли билан олиб кирилган гиёҳвандлик воситалари ва кучли таъсир қилувчи дори воситаларининг ноқонуний айланмасига чек қўйилди. Бу ҳақда ДХХ Zamon.uz'га хабар берди.
Давлат хавфсизлик хизмати Фарғона вилояти бошқармаси ходимлари томонидан Ички ишлар ва Божхона органлари билан ҳамкорликда ўтказилган тезкор тадбир давомида Қўқон шаҳрида ҳаракатланаётган, Фарғона туманида яшовчи 1995-йилда туғилган фуқаро бошқарувидаги “Дамас” русумли автомобил тўхтатилиб, холислар иштирокида кўздан кечирилган.
Текширув давомида транспорт воситаси салонидан жами 2 килограмм 40 грамм “гашиш” гиёҳвандлик моддаси ҳамда 5600 дона “Регапен” номли кучли таъсир қилувчи дори воситаси аниқланди ва белгиланган тартибда мусодара қилинган.
Терговга қадар ўтказилган суриштирувларда аниқланишича, гумонланувчи ушбу гиёҳвандлик воситаларини Қирғизистон ҳудудидаги жиноий шеригидан қабул қилиб олган ва уларни Қўқон шаҳрида сотишни режалаштирган.
Мазкур ҳолат юзасидан Давлат хавфсизлик хизматининг Фарғона вилояти бошқармаси томонидан фуқаро устидан Жиноят кодексининг 246-моддаси (контрабанда), 251-1-моддаси ҳамда 273-моддалари билан жиноят иши қўзғатилиб, гумонланувчига нисбатан “қамоқ” эҳтиёт чораси қўлланилган.
