Фарғонада чақалоқнинг ўлик туғилиши юзасидан хизмат текшируви бошланди
Тиббий хулосага кўра, ҳомиладорлик 38 ҳафталик бўлган.
Фарғона вилояти Учкўприк туманида чақалоқ ўлими билан боғлиқ ҳолат юзасидан хизмат текшируви тайинланди. Бу ҳақда туман тиббиёт бирлашмаси расмий изоҳ берди.
Маълум қилинишича, 2026 йил 30 май куни соат 00:00 да Олмурод МФЙда яшовчи, 2000-йилда туғилган M.H. туғруқ оғриқлари ва қоғаноқ сувлари кетиши шикояти билан туман туғруқхонасига мурожаат қилган. 31 май куни соат 08:40 да бемор ўлик чақалоқни дунёга келтирган.
Тиббий хулосага кўра, ҳомиладорлик 38 ҳафталик бўлиб, бу иккинчи туғруқ ҳолати ҳисобланади. Чақалоқ чаноқ билан, оёқ қисми орқали келган, жинси қиз, вазни 3300 грамм, бўйи 50 сантиметрни ташкил этган.
Соғлиқни сақлаш вазирлигининг амалдаги клиник протоколларига мувофиқ, айрим ҳолатларда кесарча кесиш амалиёти тавсия этилади. Бироқ мазкур вазиятда беморнинг иккинчи туғруқ ҳолати экани ҳамда ҳомила вазни тахминан 3100 грамм атрофида баҳоланганлиги сабабли табиий туғруқ йўли танланганлиги билдирилган.
Туғруқ жараёнида чақалоқнинг оёқ қисми чиққанидан сўнг, елка ва бош қисмини чиқаришда тиббий амалиётларда қўлланиладиган Ловсет ҳамда Morisau–Smelli–Veyt усуллари қўлланган. Бироқ техник мураккабликлар сабаб чақалоқнинг бош қисмини чиқариш қийинлашган ва чақалоқ ўлик ҳолда туғилган.
Билдирилишича, кўрсатилган реанимацион чоралар натижа бермаган.
Ҳозирда барча тиббий жараёнлар белгиланган клиник протоколлар асосида амалга оширилганлиги юзасидан хизмат текшируви давом этмоқда.
