Шавкат Мирзиёев ва Владимир Путин Жиззахдаги АЭС қурилишини бошлаб беради
Жиззах вилоятида катта қувватли иккита ҳамда ҳар бири 55 мегаватт қувватга эга иккита кичик энергоблокдан иборат АЭС барпо этилади.
Ўзбекистон президенти Шавкат Мирзиёев ва Россия президенти Владимир Путин 4 июнь куни Санкт-Петербургда бўлиб ўтадиган учрашув доирасида видеоконференсия орқали Жиззах вилоятида атом электр станцияси (АЭС) қурилиши бошланиши маросимида иштирок этади. Бу ҳақда РИА Новости Россия президенти ёрдамчиси Юрий Ушаковга таяниб, хабар берди.
Ушаковнинг сўзларига кўра, Шавкат Мирзиёев Санкт-Петербург халқаро иқтисодий форумининг хорижий меҳмонларидан бири сифатида қатнашади. Шу муносабат билан икки давлат раҳбарлари ўртасида 4 июнь куни кечқурун Константин саройида икки томонлама учрашув ҳам бўлиб ўтади.
Ушаков музокаралар Ўзбекистонда қурилиши режалаштирилган интеграциялашган атом электр станциясининг биринчи энергоблоки қурилишига старт бериш маросими билан бошланишини билдирди.
Маълум қилинишича, лойиҳа доирасида Жиззах вилоятида катта қувватли иккита ҳамда ҳар бири 55 мегаватт қувватга эга иккита кичик энергоблокдан иборат АЭС барпо этилади.
Маросимда Атом энергияси бўйича халқаро агентлик (МАGATE) бош директори Рафаэл Гросси, “Росатом” раҳбари Алексей Лихачёв ва “Ўзатом” агентлиги директори Азим Ахмедходжаев ҳам иштирок этиши кутилмоқда.
Тадбир давомида лойиҳа бўйича техник тайёргарлик юзасидан ҳисоботлар тингланади ва шундан сўнг Россия ҳамда Ўзбекистон президентлари қурилиш ишларини расман бошлашга рухсат беради.
Санкт-Петербург халқаро иқтисодий форуми жорий йил 3–6 июнь кунлари бўлиб ўтади.
