АҚШ 60 та давлатга қўшимча божлар жорий қилмоқчи
Тарифлар Канада, Мексика ва бир қатор Европа Иттифоқи мамлакатларига таъсир қилиши мумкин.
АҚШ маъмурияти 60 та давлатдан импорт қилинадиган айрим маҳсулотларга қўшимча божлар жорий этишни режалаштирмоқда. Бу ҳақда Reuters агентлиги хабар берди.
Маълумотларга кўра, ташаббус ушбу мамлакатларнинг мажбурий меҳнатга қарши кураш борасидаги саъй-ҳаракатлари етарли эмаслиги билан изоҳланмоқда. Вашингтон амалдаги савдо шароитлари америкалик ишлаб чиқарувчилар учун тенг рақобат муҳитини таъминламаётганини таъкидламоқда.
АҚШ Савдо вакили идораси томонидан тайёрланган таклифга мувофиқ, Канада, Мексика ҳамда Европа Иттифоқининг айрим давлатларини ўз ичига олган 15 мамлакат маҳсулотларига 10 фоизлик қўшимча бож жорий этилиши мумкин. Текширув остидаги яна 45 давлат учун эса тарифлар 12,5 фоизгача оширилиши режалаштирилган.
АҚШ савдо вакили Жеймисон Гриннинг таъкидлашича, ҳозирги импорт тизими америкалик ишчиларни глобал бозорда тенг бўлмаган шароитларда рақобат қилишга мажбур қилмоқда.
Шунингдек, айрим тўқимачилик маҳсулотларини имтиёзли тарифлар асосида импорт қилиш механизми ҳам таклиф этилган. Бироқ ушбу ташаббуснинг аниқ тафсилотлари ҳозирча очиқланмаган.
Таклиф этилаётган божлар энергия ресурслари, металлар, мол гўшти, қаҳва ва фармацевтика маҳсулотларига татбиқ этилмайди. Мазкур ташаббус бўйича жамоатчилик муҳокамалари 7 июл куни ўтказилиши режалаштирилган бўлиб, таклиф ва мулоҳазалар 6-июлгача қабул қилинади.
