Солиқ қўмитаси ва “Ўзбекнефтгаз”га алоқадор йирик талон-торожлик: бюджетдан 643,2 млрд сўм ўзлаштирилди
Шўртан газ-кимё мажмуаси лойиҳаси доирасида ҚҚСдан озод этилган хизматлар учун электрон ҳисоб-фактураларга ноқонуний равишда ҚҚС суммалари киритилган.
Бош прокуратура ҳузуридаги Департамент ҳамда Солиқ қўмитасининг комплаенс ва коррупсияга қарши назорат бошқармаси ҳамкорлигида ўтказилган терговга қадар текширувлар давомида 643,2 миллиард сўмлик бюджет маблағларини талон-торож қилиш билан боғлиқ ҳолат фош этилди.
Бош прокуратура ҳузуридаги департаментнинг маълум қиличича, Солиқ қўмитаси, Бухоро вилояти солиқ бошқармаси, “Ўзбекнефтгаз” АЖ ҳамда бир қатор хўжалик юритувчи субектлар мансабдор шахслари ўзаро тил бириктириб, Шўртан газ-кимё мажмуасининг ишлаб чиқариш қувватларини кенгайтириш лойиҳаси доирасида кўрсатилган хизматлар учун ноқонуний равишда қўшилган қиймат солиғи (ҚҚС) суммаларини электрон ҳисоб-фактураларга киритган.
Аммо, мазкур лойиҳа бўйича 5,3 триллион сўмлик хизматлар амалдаги қонунчиликка мувофиқ ҚҚСдан озод этилган. Шунга қарамай, ноқонуний равишда шакллантирилган ҚҚС маблағлари айрим корхоналар ҳисоб рақамларига қайтарилишига ҳамда давлат олдидаги қарздорликларнинг ёпилишига эришилган.
Оқибатда давлат бюджетига тегишли 643,2 миллиард сўм маблағ ўзлаштириш ва растрата қилиш йўли билан талон-торож қилингани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилган бўлиб, ҳозирда тергов ҳаракатлари давом эттирилмоқда.
