Ўзбекистон терма жамоасининг ЖЧдаги ўйинлари мактаблардаги “Мухлислар майдони”да намойиш этилади
Махсус фан-зоналарда мухлислар терма жамоа учрашувларини катта экранлар орқали биргаликда кузатиш имконига эга бўлади.
Ўзбекистон миллий терма жамоасининг Жаҳон чемпионати доирасидаги ўйинларини жамоавий томоша қилиш учун мамлакат бўйлаб 208 та туман ва шаҳардаги умумтаълим мактабларида “Мухлислар майдони” ташкил этилмоқда. Бу ҳақда Мактабгача ва мактаб таълими вазирлиги маълум қилди.
Лойиҳага кўра, Қорақалпоғистон Республикаси, барча вилоятлар ҳамда Тошкент шаҳрида биттадан ёки бир нечта мактаблар танлаб олиниб, уларда футбол учрашувларини катта экранлар орқали томоша қилиш учун махсус фан-зоналар ташкил этилади.
Мухлислар майдонларининг сиғими ҳудудларга қараб 50 нафардан 500 нафаргача этиб белгиланган.
Рўйхатга кўра, энг катта сиғим Наманган вилоятидаги Чуст тумани 75-мактаб ҳамда Норин тумани 2-мактабида бўлиб, ҳар бирида 500 нафаргача мухлисни қабул қилиш имконияти яратилади.
Маълумот ўрнида, Ўзбекистон терма жамоасининг жаҳон чемпионатидаги гуруҳ босқич ўйинлари жадвали (Тошкент шаҳри вақти билан) қуйидагича:
- Ўзбекистон — Колумбия (18 июнь, соат 7:00);
- Ўзбекистон — Португалия (23 июнь, соат 22:00);
- Ўзбекистон — Конго (28 июнь, соат 4:30).
