АҚШ Эрон билан сулҳдан воз кечиши мумкин — WSJ
Трамп америкалик ҳарбийлар ҳалок бўлса, Эронга қарши ҳарбий амалиётларни қайта бошлаши мумкинлигини маълум қилди.
АҚШ президенти Дональд Трамп Эрон билан тузилган сулҳга қарамай, агар Теҳрон ҳаракатлари оқибатида америкалик ҳарбийлар ҳалок бўлса, ҳарбий амалиётларни қайта бошлаш эҳтимолини кўриб чиқишга тайёрлигини билдирган. Бу ҳақда The Wall Street Journal АҚШ расмийларига таяниб хабар берди.
Нашр маълумотларига кўра, Трамп ушбу позициясини ёрдамчилари билан ёпиқ учрашувларда муҳокама қилган. Унга кўра, АҚШ ҳарбий хизматчиларининг ўлимига олиб келадиган ҳар қандай ҳаракат Вашингтоннинг сулҳ бўйича қарорларини қайта кўриб чиқишига сабаб бўлиши мумкин.
Шу билан бирга, манбаларнинг таъкидлашича, Оқ уй ҳозирча Эронга қарши ҳаво ҳужумларини тўхтатиш ҳақидаги қарорида қатъий қолмоқда.
WSJ қайд этишича, Трамп маъмурияти Яқин Шарқдаги можарони янада кенгайтириб юбормаслик мақсадида айрим чекланган кескинликларга маълум муддат давомида тоқат қилишга тайёр.
Аввалроқ АҚШ президенти Вашингтон ва Теҳрон ўртасидаги музокаралар ижобий руҳда давом этаётганини, яқин ҳафталарда муайян келишувларга эришиш эҳтимоли мавжудлигини билдирган эди.
