Шавкат Мирзиёев амалий ташриф билан Санкт-Петербургга борди
Ўзбекистон Президенти Россия Президенти Владимир Путин билан музокаралар ўтказади.
Президент Шавкат Мирзиёев амалий ташриф билан Санкт-Петербург шаҳрига борди.
“Пулково” халқаро аэропортида олий мартабали меҳмонни Россия Ҳукумати Раисининг биринчи ўринбосари Денис Мантуров, Санкт-Петербург шаҳри губернатори Александр Беглов ҳамда бошқа расмийлар кутиб олди.
Ташриф дастурига мувофиқ, Ўзбекистон Президенти бугун Владимир Путин билан учрашув ўтказади. Музокаралар давомида икки томонлама ҳамкорликнинг долзарб йўналишлари муҳокама қилиниши кутилмоқда.
Шунингдек, давлат раҳбари Ўзбекистонда биринчи интеграциялашган атом электр станцияси реакторининг қурилишини бошлаш маросимида иштирок этади.
5 июнь куни Шавкат Мирзиёев 29-Петербург халқаро иқтисодий форумининг асосий тадбирларида ҳам қатнашиши режалаштирилган.
