Ўзбекистон ва Қирғизистон етакчилари телефон орқали мулоқот ўтказди
Ўзбекистон Президенти Қирғизистоннинг БМТ Хавфсизлик Кенгашига сайлангани билан Садир Жапаровни табриклади.
Президент Шавкат Мирзиёев 4 июнь куни Қирғизистон президенти Садир Жапаров билан телефон орқали мулоқот қилди.
Суҳбат аввалида давлат раҳбари Садир Жапаровни ва қардош қирғиз халқини мамлакатнинг 2027–2028 йилларда БМТ Хавфсизлик Кенгашининг доимий бўлмаган аъзоси этиб сайлангани муносабати билан самимий табриклади.
Шавкат Мирзиёев ушбу натижа Қирғизистоннинг фаол ташқи сиёсати, шунингдек, минтақавий барқарорлик ва хавфсизликни таъминлашга қўшаётган ҳиссаси халқаро ҳамжамият томонидан эътироф этилганининг ёрқин ифодаси эканини таъкидлади.
Давлат раҳбарлари Ўзбекистон ва Қирғизистон ўртасидаги дўстлик, яхши қўшничилик ҳамда стратегик шериклик муносабатлари юксак даражага кўтарилганини мамнуният билан қайд этдилар.
Шунингдек, олий даражадаги учрашувлар давомида эришилган келишувлар, хусусан, иқтисодиёт, транспорт, энергетика ҳамда маданий-гуманитар соҳалардаги лойиҳаларни амалий жиҳатдан илгари суриш масалалари муҳокама қилинди.
Суҳбат якунида томонлар бўлажак олий ва юқори даражадаги тадбирлар режасини ҳам кўриб чиқдилар.
Аввалроқ, Қирғизистон тарихда илк бор БМТ Хавфсизлик Кенгашининг доимий бўлмаган аъзоси бўлгани хабар қилинган эди.
