Ҳантер Байден яхши натижаларга эриша олади — Трамп

 

АҚШ президенти Доналд Трамп собиқ президент Жо Байденнинг ўғли Ҳантер Байденнинг келажакдаги президентлик сайловларида Демократлар партиясидан муносиб номзод бўлиши мумкинлигини таъкидлаган деб хабар беради Риа новости.

 

Оқ уйда журналистлар билан мулоқот чоғида Ҳантер Байденнинг сиёсий истиқболлари ҳақида саволга жавоб берган Трамп: “Менимча, Ҳантер яхши натижаларга эриша олади”, деган.

 

Трампнинг ушбу баёноти Демократлар партиясида 2028 йилги президентлик сайловлари учун эҳтимолий номзодлар атрофидаги муҳокамалар кучайиб бораётган бир пайтда янграган. АҚШ раҳбари Ҳантер Байденнинг номзод сифатидаги имкониятларига ижобий баҳо берар экан, партия ичидаги бошқа даъвогарлар ҳам маълум даражада қўллаб-қувватланаётганини қайд этган.

 

Аввалроқ Ҳантер Байден ҳам сиёсий фаолиятини давом эттириши мумкинлигига ишора қилганди. Хусусан, амалдаги вице-президент Жей Ди Венс билан эҳтимолий сиёсий рақобат ҳақида сўралганда, у “Кетдик”, дея жавоб қайтарган.

 

Сўнгги интервюларидан бирида Ҳантер Байден ўтмишда гиёҳвандлик билан боғлиқ жиддий муаммоларни бошдан кечирганини тан олиб, 2019-йилдан буён яхши ҳаёт кечираётганини маълум қилган. У АҚШ тарихида амалдаги президентнинг жиноий айбловларга дуч келган илк фарзанди сифатида ҳам тилга олинади.

 

Жо Байден президентлик ваколатлари якунланиши арафасида ўғли Ҳантер Байденни афв этиш тўғрисидаги қарорни имзолаган. Мазкур қарор АҚШ сиёсий доиралари ва жамоатчилиги орасида кенг муҳокамаларга сабаб бўлган.

 

Сиёсий кузатувчилар фикрича, агар Ҳантер Байден келажакдаги президентлик пойгасида иштирок этишга қарор қилса, унинг номзоди Демократлар партияси ичидаги энг кўп эътибор қаратиладиган ва баҳс-мунозараларга сабаб бўладиган номзодлардан бирига айланиши мумкин.

 

Эслатиб ўтамиз, аввалроқ Ҳантер Байденнинг қарзлари туфайли АҚШни тарк этгани хабар қилинган эди.