АҚШ Куба президентига қарши санкциялар жорий этди
Ҳарбий ва хавфсизлик тузилмалари ҳам санкциялар рўйхатига киритилган.
АҚШ Молия вазирлиги Куба президенти Мигел Диас-Канел ҳамда у билан боғлиқ айрим шахслар ва ташкилотларга қарши янги санкциялар жорий этди деб хабар беради департамент веб-сайти.
Маълумотларга кўра, санкциялар рўйхатига Куба қуролли кучлари, ички хавфсизлик ва разведка тизимлари, шунингдек, “Инқилобни ҳимоя қилиш қўмиталари” ҳам киритилган.
Мигел Диас-Канел 2018 йилдан буён Куба президенти сифатида фаолият юритиб келмоқда. У мамлакат раҳбарлигида собиқ етакчи Раул Кастронинг ўрнини эгаллаган.
Шунингдек, АҚШ май ойида Кубанинг 11 нафар амалдорига, жумладан, алоқа вазири ва бир қатор ҳарбий раҳбарларга ҳам санкциялар жорий қилган эди.
Аввалроқ АҚШ Адлия вазирлиги 94 ёшли Раул Кастрони 1996 йилда содир бўлган авиация ҳодисаси билан боғлиқ воқеалар юзасидан қотилликда айблаган эди.
Куба президенти Мигел Диас-Канел АҚШ томонидан илгари сурилган айблов ва санкцияларни “сиёсий босим ва асоссиз даъволар” деб баҳолаган.
