Саҳрои Кабирда 50 га яқин киши сувсизликдан ҳалок бўлди

Нигернинг шимолий қисмидаги Саҳрои Кабир чўлида юк машинаси бузилиб қолиши оқибатида камида 49 киши ҳалок бўлди. Бу ҳақда BBC хабар берди.

 

Маҳаллий ҳокимият маълумотларига кўра, қурбонлар узоқ вақт давомида сувсиз қолган. Ҳодиса Қурбон ҳайити муносабати билан Малига борган ва у ердан қайтаётган Нигер фуқаролари билан содир бўлган. 

 

Уларни олиб кетаётган юк машинаси Нигер ва Жазоир чегарасидаги Ассамака ўтиш пунктидан 80 километрдан ортиқ масофада бузилиб қолган.

 

Агадез вилояти губернатори маълум қилишича, йўловчилар юқори ҳарорат ҳукм сураётган ва таъминот манбалари мавжуд бўлмаган ҳудудда қолиб кетган. Ҳайдовчи ва йўловчилар бир неча кун давомида транспорт воситасини таъмирлашга уринган, бироқ бунинг уддасидан чиқа олмаган.

 

Натижада йўловчиларнинг аксарияти сувсизликдан вафот этган. Қутқарувчилар юк машинаси остида ва унинг атрофида ўнлаб жасадларни топган. Ҳалок бўлганларнинг барчаси Нигер фуқаролари бўлиб, улар оммавий қабрларга дафн этилган.

 

Фожиадан фақат икки киши омон қолган. Улар пиёда Ассамакагача етиб бориб, ҳодиса ҳақида ҳокимият органларига хабар берган.

 

Қутқарув гуруҳи воқеа жойидан қайтаётганда яна бир бузилиб қолган юк машинасини аниқлаган. Унда бўлган 60 нафардан ортиқ киши аккумулятор носозлиги сабаб уч кун давомида чўлда қолиб кетган. Қутқарувчилар уларга сув етказиб берган ва транспорт воситасини таъмирлашга ёрдам кўрсатган.

 

Мутахассислар Нигер чўли Ғарбий Африкадан Европага йўл олган муҳожирлар учун асосий транзит йўналишларидан бири бўлиб қолаётганини, бироқ бу йўл катта хавф-хатарлар билан боғлиқлигини таъкидламоқда.